【自助餐放蛇起底组】旺角$158任食 芝士x部队锅

如果你锺意食部队锅，又中意食芝士，咁啱晒啦！旺角呢间主打部队锅放题的餐厅，最近推出了芝士口味，究竟芝味浓唔浓郁呢？立即去片！

8款自选汤底　配料区选择丰富

未开始睇menu，就已经有几兜前菜俾我哋食，有泡菜、芽菜同黄瓜可以任食，仲可以任添。一路食可以一路谂下叫咩汤底，本身就有8款自选汤锅，有猪骨浓汤、麻辣及药膳汤底等，不过今次我哋要嚟试佢期间限定嘅芝味部队锅，另外肉类就有几款不同套餐，最平$158可以落到楼，包一款严选牛肉及梅豚肉任食，儘管试试佢！

叫咗芝士锅之后，两分几钟后芝士锅、一兜芝士碎、各一碟牛、豚肉就已经上枱啦，都好快手，仲拎埋胶袋同橡筋篮过嚟，俾我哋入住电话同绑头髮，以免打边炉期间整污糟，非常贴心！

芝士锅味道其实唔算超浓郁嗰只，芝士味适中嘅，似韩国芝士汤麵嗰只味，不过如果你觉得唔够喉，都可以自己再加芝士碎落去，但加晒之后如果想再添，就要加$5一兜啦！

然后就可以出去拎配料，有鱼片串、猪皮、猪大肠、年糕、公仔麵同菜等，行过少少个冻柜仲有熊仔鱼饼、海鲜球、午餐肉、饺子同肠等，几多选择喎！另外饮品都喺任饮，有汽水同收埋一边嘅韩国绿茶。

碎湿湿牛肉好难食　高质部队锅配料

任食的牛肉脂肪多，部份更有小黑点，一夹起更加不堪一击，超易烂，食落口感碎湿湿，似俾人食过咁，我食咗一片就无再掂过佢，好难食。豚肉就正常得多，不过由于昆是薄切，唔好渌咁耐。

一路食部队锅，店员都好主动上前加汤，汤底芝士味都会淡咗嫁，要keep住加返芝士碎落去，一兜绝对唔够加啰，要加$5再要！

甜品有Mousse cake+乳酪

食埋甜品先算完美finish！甜品柜有mousse cake，四四方方细细件，可以试匀咁多款味，mousse都滑嘅，无颗粒，朱古力味最好食。另外都有乳酪机，得一款原味乳酪，仲有彩针、朱古力酱等可自己DIY。

总结:

虽然对比返同类部队锅放题，$158呢个价钱有少少贵，而且芝士要另外加钱都要扣少少分，但嘢食都多选择，大部分味道都唔错。而且服务都OK，店员都有礼貌同会主动加汤。另外90分钟有少少急，不过如果无人喺门口排队的话，店员都会俾我哋继续坐嘅。但平日夜晚7点多8点都已经爆场，门口仲有人等位，所以想慢慢食就早啲去啦。

总分:

7.5/10

KPOT 部队锅

地址: 旺角弥敦道613号飞达商业大厦1楼(显示地图)

电话：2481 1388

部队锅放题供应时间: 4:30pm-2am

美国严选牛肉放题收费: 成人:$158、小童/长者:$108

用餐时间:入座时间起计90分钟

备注:收加一

 

延伸阅读:

流心朱古力与芝士饺子麵包！大件、鬆软、似花师奶

【18区扫食】甜品控召集！西环最强甜品地图